Intandaro yo guhindagurika kwa hato na hato kw'ikirere, ni inzira umuntu anyuramo, ashaka uko abona ibimutunga. 

Inyigo iherutse gukorwa, yasohowe n'ikinyamakuru the Nature cyandikirwa mu Bwongereza, igaragaza ko umuntu akwiye kugabanya kurya inyama zitukura ku rugero nibura rwa 75 ku ijana.

Abakoze iyo nyigo isesengura n'ibitunga umuntu batekereza ku bwiyongere bw'abaturage, batanga inama ko abantu bakwiye gutungwa cyane n'ibimera.

Inyama z'umweru nazo nk'iz'inkoko, nazo umuntu akwiye kuzigabanya, ndetse akagabanya n'ikoreshwa ry'amata n'ibiyakomokaho.

Kuva mu myaka 50 ishize inyama zicuruzwa ku isi, zavuye kuri toni miliyoni 75 ku mwaka zigera kuri toni miliyoni 300. Ni ukuvuga ko umuturage wo bihugu bikungahaye abarirwa ibiro 76 by'inyama arya buri mwaka, mu gihe uwo mu bihugu bikiri mu nzira y'amajyambere we arya ibiro 43 buri mwaka.

Bikomeje uko bimeze ubu, imyuka ihumanya ikirere ishobora kwiyongera ho 30 ku ijana mu myaka 25 iri imbere, nyamara raporo y'impuguke zihuriwe ho na za guverinoma z'ibihugu ku birebana n'ubwiyongere bw'imyuka yoherezwa mu kirere, iteganya ko mu myaka 30 iri imbere, nta mwuka wa CO2 uzaba woherezwa mu kirere.

Igabanuka ry'imyuka ihumanya ikirere ryagerwa ho rijyanye n'igabanuka ry'ikwirakwizwa ry'ibikomoka ku nyamaswa.

Ibyo byagirira ikirere inyungu cyane, kuko ikoreshwa ry'ibikomoka ku nyamaswa, ryihariye ryonyine hagati ya 72-78 ku ijana, by'imyuka mibi yoherezwa mu kirere, bigereranyijwe n'ibikokomoka ku buhinzi mu isi yose.

Dufashe urugero, gutunganya ikilo kimwe cy'inyama z'inka, byohereza mu kirere ibiro 32,5 by'imyuka ishobora kugihumanya; gutunganya ikilo cy'inyama z'intama byohereza yo ibiro 33; mu gihe gutunganya ikilo cy'inyama z'ingurube horerezwa mu kirere.

Nyamara gutunganya ikilo cya soya hoherezwa mu kirere ibilo 0,1 by'imyuka mibi; gutunganya imboga zitandukanye hoherezwa mu kirere ibilo 0,06 by'imyuka mibi, mu gihe gutunganya ikilo cya noix hoherezwa mu kirere ibilo 0,7 by'imyuka mibi, n'ibilo 1,18 by'imyuka mibi yoherezwa mu kirere ngo hatunganywe ikilo kimwe cy'umuceri.

Uretse iyo myuka yoherezwa mu kirere, inyamaswa ziribwa n'abantu zihaye ubuso bunini bw'ubutaka bushobora guhingwa, aho ikilo kimwe cy'inka; intama; ingurube cyangwa inkoko, gisaba meterokare ziri hagati y'enye n'esheshatu.