Ibintu 10 umugore yanga ku mugabo we mu mibanire yabo

Umuhanzi umwe yarararimbye ngo icyo umugore ashaka, Imana iba igishaka. Koko rero iyo umugore amaze kugera mu rugo, hari ibyo yifuza ko umugabo we yajya yitwarararika, kugira ngo barwubake rukomere. Hari ibyo ibyo yanga cyane, bityo uwo bashakanye amukundiye, imibanire yabo iba myiza.

Nyuma yo kurema umuntu, Imana yamuhaye umurimo ukomeye wo kuyobora ibiremwa bindi. Umurimo wa mbere wari uwo kubyita amazina. Muri uwo murimo, yaje gutahura ko inyamaswa zimunyura imbere ngo azite izina ari ebyiri, we akaba wenyine. Byatumye Imana imuremere umugore.

Muri iyi nyandiko, tugiye kurebera hamwe bimwe mu bintu umugore adakunda, akifuza ko umugabo we yabyirinda, bakubaka rugakomera.  Abagabo nabo bagira ibyo bakunda ku bagore  umuntu yakwitegereza agasanga hari bimwe na bimwe bahuriyeho. Ibyo birasanzwe ko hari imico y'abantu bamwe na bamwe abandi bakunda ndetse bakaba banayigana, bitewe n'uko babona kuba hamwe nabo byabashimisha.

Niyo mpamvu hari imico itari myiza abagore batifuza ku bagabo babashatse.

1. Umugore ntakunda umugabo utamubwira neza (utamusingiza)

Burya iyo umugore abwiwe nabi n'umugabo we, yibwira ko abikoreye impamvu. Nk'uko abagore ari abantu basesengura cyane kandi amarangamutima yabo akaba hafi, iyo umugabo amubwiye nabi yibaza ko hari abandi abwira neza. Ibyo bishobora gutuma umugore atakariza umugabo icyizere, ndetse no gusenya ntibibe kure, niyo mpamvu abagabo bakwiye kwiga kubwira abagore amagambo abataka, ababwira ko ari beza.

 2. umugore yanga umugabo umubeshya

Abagore cyangwa abakobwa ntibakunda umugabo utababwiza ukuri. Iyo asezeranijwe n' umugabo we cyangwa umukunzi we ikintu iki n'iki, umugore cyangwa umukobwa arabizirikana, ahubwo agasigara ategereje igihe bizasohorezwa. Iyo asanze umugabo avuga amagambo menshi akagera aho akibagirwa isezerano, amutakariza icyizere, kabone n'iyo yamwizeza ko yisubiye ho ntashobora kongera kumwizera

3. Abagore banga abagabo babavunisha

Igihe cyose umugabo abwira umugore we ko imirimo y'urugo ari iye cyangwa ngo gahunda zimwe na zimwe zireba umugore gusa. Ibi bibangamira umugore cyane. Aha twavuga nk'aho umugabo ahora abwira umugore ko abana ari abe.

Igihe umugabo yiriwe mu rugo ntabiteho, umugore yataha, umugabo akamubwira ngo "reba uko abana bawe basa", ngo "nk'ubu umaze iki" n'andi magambo atari meza.

Niba hari umugabo wajyaga akora ibintu nk'ibi, akumva ko ari mu kuri, akwiye kugerageza akabigabanye, ndetse akabicikaho kuko abagore babyanga urunuka.

4. Umugore yanga umugabo utamuha impano zitunguranye (Surprise)

Umugore akunda umugabo umuha impano. Bituma umugore agirira umugabo icyizere gikomeye, kuko abona ko umugabo we aho ari hose amutekereza.

5. Umugore yanga umugabo utamuha umwanya cyane cyane iyo bari ahahuriye abantu benshi (utamutetesha)

Umugore akunda ko umugabo we amwitaho igihe cyose bari kumwe. Ibi ni ibintu bishimisha abagore benshi, kuko iyo umugabo yeretse umugore ko amukeneye cyangwa ko ashaka kuba hamwe nawe, bituma umugore nawe akora ibishoboka byose ngo ashimishe umugabo we.

Niba hari abagabo batahaga agaciro kwita ku mugore we, atangire kubyitoza, ajye yereka umugore we ko amwitayeho kandi akeneye ibiganiro bye.

Ibi btuma umugore abona ko akunzwe bigatuma nawe akunda umugabo we. Ikintu gishimisha umugore cyane ni ukumva umugabo ahora amubwira ko amukunda.

 

6. Umugore yanga umugabo utamwitaho (ku birebana n'uburanga)

N'ubwo abantu batanganya ubushobozi, umugore yifuza ko muri bike bafite, umugabo yagira icyo yigomwa akamwitaho ku bijyanye n'ubwiza.

Ni ukuvuga ko umugore wese aho ava akagera akunda ko umugabo amenya ko akeneye kwambara neza, gukoresha umusatsi, ndetse no kumenya ko abana babo bagomba gusa neza, nk'uko bakunze kubivuga ko icyubahiro cy'urugo kigaragarira ku mugore.

7. Umugore yanga umugabo utamutega amatwi

Umugore ntakunda umugabo utamutega amatwi. Mu gihe umugore aganirira umugabo we, ni byiza ko umugabo amutega amatwi akamwereka ko ibyo arimo kumubwira bimwubaka kandi yishimiye kuganira na we.

N'iyo umugabo yaba yumva udashaka kubyumva, agomba gukora uko ashoboye akamwereka ko ashaka kumwumva.

8. Umugore ntakunda umugabo usesagura

Gusesagura umutungo w'ururgo, ni ikintu kibangamira abagore benshi mu mibanire yabo n'abo bashakanye.

Ubusanzwe abagabo bakunda kugira aho bahurira iyo bakitse imirimo, bagasangira agacupa bungurana ibitekerezo. Ibyo abagore nta kibazo babibona mo iyo abagabo badakengesheje, kandi bagataha hakiri kare.

Akenshi rero abagabo barizihirwa, bakibagirwa ko umutungo utakiri uwabo gusa bakawukoresha uko bashaka. Kubera kutamenya ibikenewe mu rugo nk'umugore, isesagura ry'umugabo riramubabaza cyane, akabifata nk'aho umugabo adashishishikajwe n'iterambere ry'urugo rwabo.

9. Umugore akunda umugabo utamuca inyuma

Iyo umugore abonye ibimenyetso bimugaragariza ko umugabo we ashobora kuba amuca inyuma, biramubabaza ndetse cyane. Abibwirwa n'uko umugabo ahora atanga ingero ku bandi bagore, abwira umugore we imyambarire y'abandi, umusatsi wabo, uko abandi bagore bafata abagabo babo neza, bigatuma umugore atekereza ko umugabo amuca inyuma. Ibi rero abagore babyanga urunuka. Umugabo wajyaga akora nk'ibi tuvuze haruguru atabizi cyangwa se abizi ariko atazi ko ari bibi yisubireho.

Abagore ariko nabo, bakore iyo bwabaga bongere umwanya wo kwita ku bagabo babo, byose ntibiharirwe abakozi cyangwa abandi baba mu rugo. Umugore akwiye kumenya ko umugabo ariwe yashatse, atashatse umukozi cyangwa undi muntu uri mu rugo.

10. Umugore yanga umugabo utamugisha inama

Bikunzwe kuvugwa cyane cyane mu byaro bitandukanye ko umugabo ujya inama n'umugore aba yarabaye  inganzwa. Ibyo si ko biri, kuko umugore na we ari umuntu utekereza kandi urugo umugabo ajya inama n'umugore, rwihuta mu iterambere.

Umugore yishimira kubona iterambere ry'urugo afatanyije n'umugabo kubaka nawe arifite mo uruhare. Bityo ashaka kumva umugabo amusangije igitekerezo cye, akamubaza uko acyumva, mbese bakajya inama ikanoga, umushinga ugashyirwa mu bikorwa.

Ibi rero abagabo benshi ntibabyibuka. Iyo atekereje umushinga, ntiyibuka kugisha inama umufasha we, kandi nyine ari icyo abereye aho. Ni kimwe n'iyo igitekerezo cy'umushinga wagirira akamaro urugo, giturutse ku mugore. Umugabo akwiye gutuza agatega amatwi umugore we, uwo mushinga ugakorerwa ubugororangingo maze ugashyirwa mu bikorwa.

Ingo nyinshi, zisenyuka cyangwa ntizubakwa kubera gusuzugura utuntu twitwa ko ari duto. Nyamara abanyarwanda bo bavuga ko impamvu ingana ururo. Umugabo cyangwa umusore ugerageza kwitwararika utu tuntu duto tuvuze haruguru, bizakugirira akamaro mu mibanire yawe n'umugore we