• 2024-01-04
• admin123
• Munyandamutsa
• 157

Cyirima I na Yuhi IV bimye ingoma bataraba ibisekeramwanzi

U Rwanda rwagize abami batandukanye kandi basumbanya ibigwi bitewe n'ibyo bakoze mu kuzamura imibereho n'ubukungu by'abanyarwanda. Uretse n'ibyo ariko kwagura imbago z'u Rwanda mu gihe cyabo cyari kimwe mu byo bari bagamije, kubigera ho nabwo bwari ubuhangange.

 Kuva hambere abami b'u Rwanda bagiye basiga umurage mu miyoborere y'ibihe byose y'igihugu mu Rwanda. Ibyo byatumaga bitwa abami b'ibihangange, dufashe nk'urugero rwa Cyirima II Rujugira, wadukanye irerero, kuko abana be bavutse ari ijana ku bagore batandukanye barererwaga hamwe, bibavira mo gukura bakunda cyane byaje gutuma bahwa izina ry'Abatangana.

Urugerero ruciye ingando rwadutse ku ngoma ye kubera amage u Rwanda rwari rurimo. Ibihugu birukikije byashakaga kurugabagabana. Ibyo ni u Burundi; i Gisaka na Ndorwa.

Muri izi nyandiko turibanda ku mirage yatanzwe n'abami babiri babayeho mu bihe bitandukanye, ariko bahuriye ku kuba barimye ingoma bataraba ibisekeramwanzi.

Cyirima I Rugwe yavutse se ari mu itabaro

Ubushyamirana bwahoraga hagati y'ingoma y'u Rwanda n'iy'i Gisaka bwarangijwe n'uko Rukurura ingoma y'i Gisaka ifashwe n'iy'u Rwanda icyo gihe hayoboraga Mutara II Rwogera.

Mbere y'aha ariko Kimenyi I Musaya yashatse kwigarurira u Rwanda abinyujije mu maraso aruvukamo. Yiyemeje gusaba umugeni akaba mushiki w'umwami witwaga Robwa, ibwami mu Rwanda, ruyobowe na Ruganzu I Bwimba. Amaze kumuhabwa Ruganzu n'abapfumu be bereza ko Nkurukumbi wari nyirarume atabara bucengere, akicirwa mu Gisaka, ariko arabyanga.

Ruganzu yitabarira ubwe, amaze kwambuka Muhazi anyuze mu kazinga kitwa Akarwa kari muri Muhazi, intumwa nyina Nyakanga yari yohereje kumugarura arazibwira ati: "mugende mubwire muti Umusindi yarenze akarwa".

Aragenda akambika ahantu ahitwa Tabirago, haje guhindurirwa izina hakitwa Sasabirago ubu ni mu kagari ka Sasabirago mu murenge wa Fumbwe mu karere ka Rwamagana, ahategerereza ko umugore we yari asize akuriwe abyara.

Ijoro rimwe ngo umwami arasira ingwe hejuru y'urugo, bukeye mu gitondo Mukubu wari intumwa ye na Cyenge cya Nyakesa wari usigariye Ruganzu ku ngoma, aza kumubwira inkuru nziza ko umwamikazi yaraye abyaye umwana w'umuhungu. Ruganzu amuha uruhu rwa ya ngwe ararumuha amubwira ati "akira munshyirire ibyahi, kandi izina rye ni Rugwe".

Ubwo Ruganzu arabona aratabara, we n'ingabo zari zimuherekeje bageze ahitwa Nkungu na Munyaga,  bahura n'inyamaswa abahigi ba Kimenyi I bari bavumbuye, abanyarwanda barayica. Ubundi mu buhigi inyamaswa ni iy'uwayivumbuye, uwayishe agahabwa ingusho.

Abahigi bo mu Gisaka bageze aho basaba inyamaswa yabo, abanyarwanda bashakaga ko barwana barayibima, intambarara irarota, Ruganzu Bwimba ayigwa mo. Aho yiciwe hari igiti cy'umuguruka bahita ku muguruka wa nkurumbi.

Kimenyi I atashye abikira Robwa urupfu rwa musaza we, mu rwego rwo kumuhoza amarira amugabira Rukurura ngo umwana azabyara azayime, kuko yari atwite akuriwe. Ariko ayiyahuraho ahwana n'uwo yari atwite.

Hagati aho mu Rwanda umuvandimwe wa Ruganzu witwa Mwendo yaje guhungura Nyakiyaga amugira mugore we, ariko ashaka kubyuririra ho ngo yigarurire ingoma, adasigariye ho Ruganzu, ahubwo ari umwami. Kuko Rugwe atakuze neza, biza guhwihwiswa ko Mwendo yamuroze. Bikomeje kuvugwa, Mwendo aza kubona ko byazamukora ho, acikira mu Bugesera.  

Rugwe agaragaza ko amaze kugira ubushobozi bwo kuyobora igihugu

Rugwe nawe arakura aba umusore w'igihame, ariko mbere y'uko Ruganzu atabara yari yasize avuze ko Rugwe nagera igihe cyo kuba umwami ari we uzabyerekana, hagati aho Cyenge niwe wari gukomeza asigariye ho Ruganzu I kugeza icyo gihe.

Umunsi umwe Cyenge n'abahigi be babyukurutsa umuhigo, baza kwica impongo, maze babiri mu bahigi bagira impaka zikomeye z'uko umwe ari we warashe iyo mpongo, undi agahakana avuga ko ari we wayirashe. Barakomeza bajya impaka kugeza ubwo bivuye mo urubanza rukomereye Cyenge n'abandi batware bari aho.

Ubushobozi bw'umwami bwo kuyobora igihugu mu gihe cyo hambere mu Rwanda, bwagaragariraga mu bintu byinshi, kimwe muri byo kikaba guca imanza. Mu gihe Cyenge n'abatware bari bakirebana babuze uko baca urwo rubanza, Rugwe wari wicaranye na Cyenge aramubaza ati "aba bahigi nta mugabo wabonye umwe muri bo arasa iyo mpongo ngo amuzane"? Ati "umwe nazane umugabo wamubonye undi nawe azane uwamubonye".

Abiru na Cyenge bamenya ko igihe cya Rugwe cyo kwima ingoma cyageze, baramwimika, yitwa Cyirima I.

Uko yarongoye Nyanguge ya Shyagashya umukobwa wo mu Bugufi, tuzabireba mu nyandiko zacu zitaha.

Mu nyandiko yacu itaha tuzarebera hamwe ibya Yuhi IV Gahindiro.