• 2024-01-05
• admin123
• Munyandamutsa
• 274

Amanywa n ijoro ikirekire rubuze gica Gahindiro abaha inama

Kigeri III Ndabarasa amaze gutanga, abana be barwaniye ingoma. Muri iryo hangana uwarazwe ingoma Mibambwe III Mutabazi III Sentabyo abigendanira mo n'umuhungu we wari ukiri muto, kuko uyu mwami yari yimye ingoma akiri umusore w'umugenda. Gusa yagize akanya gato ko kureba umuhungu we yabyaranye na Nyiratunga mu ibanga rikomeye asiga amwise Gahindiro.

Munyandamutsa

Kuva ku ngoma ya Mutara I Semugeshi, byari bizwi ko umwami witwa Cyirima na Mutara bimikaga Kigeri uzabazungura, nawe akerekana mu bahungu be uzaba Mibambwe.

Ni muri urwo Rwego mbere y'uko atanga, Cyirima II Rujugira atanga, yimitse Kigeri III Ndabarasa, nawe yereka se ko azazungurwa na Mutabazi.

Cyirima II yitegereza uwo mwuzukuru we ngo wari ufite uruti ruto (yari ananutse), amwita Sentabyo. Iryo zina riramamara kuruta irye bwite, kuko no muri rubanda ari uko bamwitaga, ndetse hakaba n'abakabya bakamwita Mpwerazikamwa.

Kigeri III amaze gutanga, abahungu be bitwaga Ibigina kuko ngo bari inzobe cyane bose, barwanira ingoma, Gatarabuhura yanga kuyoboka Mibambwwe III, ahubwo ahita mo gucikira mu Gisaka kwa Kimenyi IV Getura.

Ari mu Gisaka, Gatarabuhura wari umutoni ku mwami w'i Mukiza (umurwa wabo ni uko witwaga), akajya yohereza abajya kwica umuvandimwe we wari umwami, ariko bikabananira. Mu minsi yakurikiye ho, mu Gisaka haza gutera icyorezo cy'ubushita, gihitana abantu batagira ingano.

Gatarabuhura ashaka uruhu rw'ingwe arusasira umuntu wari urwaye iyo ndwara maze arwoherereza umwami w'u Rwanda mu izina ry'umwami w'i Gisaka, undi ararwakira ndetse ararwiyorosa maze yandura iyo ndwara yaje no kumuhitana n'umuhungu we.

Gahindiro yima ingoma ari uruhija

Gatarabuhura amaze kumenya inkuru y'itanga rya Mibambwe III Mutabazi II Sentabyo, ava mu Gisaka azi ko aje kuzungura ingoma ya se Kigeri III, abanza kwimenyekanisha mu gace k'iburasirazuba, abamushyigikiye bamwakira bishimye, mu gihe abatamushyigikiye bihutira ga kumenyesha ibwami mu Rwanda, intambwe yose ya Gatarabuhura.

Abatekereza  bamwe bavuga ko Gatarabuhura yaba yarasabye Kimenyi IV kumuha ingabo zimuherekeza, kuko nta wamenya ibyaba mu ntango y'ingoma.

Umwami w'i Gisaka amusubiza ko kugira ngo amuhe ingabo zizamufasha, ari uko nawe amwemerera ko mu gihe Gatarabuhura azaba abaye umwami azamuha u Buganza, nk'igihembo cy'uwo murimo aba amukoreye.

Gatarabuhura arabihakana, amusubiza ko aramutse amuhaye u Buganza atabona aho azaragira inyambo ze.

Kimenyi nawe amusubiza ko ngo yamaze kumenya ko Mibambwe III yasize uruhinja ati "genda ubanze ukiranuke n'urwo ruhinja nyuma y'aho tuzongera tuvuge iby'u Buganza n'izo nyambo zawe". Ni uko uko Gatarabuhura yamenye inkuru y'uko Sentabyo yasize umwana.

Nyuma yo kuzenguruka igice cyo mu burasirazuba bwa Nyabarongo gitware, Gatarabuhura yambuka Nyabarongo ayoboye abarwanyi batagira ingano, agenda Nduga yose akambika i Mayunzwe mu cyahoze ari Komini Tambwe.

Umurwa w'u Rwanda wari i Butare (ahubatse ikigo nderabuzima cya Ruhango), mu cyahoze ari Komini Kigoma ubu hombi ni mu karere ka Ruhango.

Abajyanama ba Gatarabuhura bamubwira ko adakwiye kugaba igitero, kuko yaba agiye kwica abantu be n'ubundi. Ahubwo igikwiye ari uko yakohereza abantu bakica umugabekazi n'umuhungu we.

Gatarabuhura yemera iyo nama, ariko abatasi b'ibwami bari benshi kwa Gatarabuhura byagaragaraga ko ari we ufite imbaraga, baba baritaye mu gutwi, babimenyesha i Butare. Nabo bitegura abo bashyitsi bari bagiye kubagenderera.

Biyemeje kubatega umutego w'ubutabazi, maze umuja w'ibwami witwaga Kiyange yitangira gusimbura umugabekazi, Nyiramuhanda nawe atanga umwana w'umuhungu witwa Rubanzangabo, baryama aho Nyiratunga na Gahindiro bagomba kuryama, maze abo baturutse kwa Gatarabuhura batagombaga kugira inkomyi n'imwe cyane cyane y'abararizi, maze baraza bica Kiyange na Rubanzangabo bajya kuvuga amacumu y'uko byagenze.

Ariko baza gutungurwa no kumva indamutsa y'i Butare. Bamenya ko babeshywe, maze babanga imiheto, urugamba rurambikana, bararasana, bigeze ku manywa y'ihangu Semugaza n'Urukatsa bavuna iz'i Butare zasaga n'iziganzwa, maze urugamba ruhindura isura, iza Gatarabura zikubitwa inshuro ziratsindwa, na Gatarabura arafatwa aroherwa.

Ari amanywa n'ijoro ikirekire ni ikihe?

Yuhi IV Gahindiro akomeza gukura kugeza ubwo abantu bari ku karubanda baje kujya impaka. Bibazaga icyaba kirekire hagati y'amanywa n'ijoro.

Izo mpaka zabaye ndende zigera ubwo zihinduka nk'urubanza. Bamwe bakavuga ko ijoro ari ryo rirerire abandi bakemeza ko amanywa ari yo maremare. Muri icyo gihe Nyirayuhi IV Nyiratunga niwe wayoboreraga umuhungu we igihugu. Gahindiro yaje kubumva abaha inama ati mushake ibintu mushobora gukoresha, mubohe umurunga ijoro ryose, n'abandi bazabigenze batyo babohe umurunga amanywa yose badahagarara maze tuzabigereranye. Umwanzuro uba ko bingana.

Haciye iminsi, abashumba nabo bajya impaka z'amariba afite amazi aryohera inka. Na none Gahindiro yari aho arabumva, arangije arababwira ati “muzareke inka zibe ari zo zica uru rubanza”.

Baragenda bavoma amazi muri ayo mariba, maze bayashyira mu bibumbiro, barangije bazana inka barazishora ariko ntibazikundira kunywa ngo zikuke, zanywaho gake bakazimira maze barazahura, mu gihe cyo gushoka barazireka zijya kunywa zikurikije aho zumvise amazi aziryoheye.

Maze amariba akurikirana muri ubu buryo:

Rushya ya Nyamirango (aho ubu si mu Rwanda) iba iya mbere; Mupfu (soma nka reka) ya Bunyambiriri iba iya kabiri nayo Ngugu y'Umutara iba iya gatatu.

Mu gukemura izi manza zombi, byagaragaje ubushobozi bwe bwo guca imanza kandi zikomeye, maze umugabekazi abona ko umuhungu we ageze igihe cyo kuyobora igihugu, amuha ingoma.