• 2020-03-18
• admin123
• Bimenyimana Jérémie
• 154

Gukorera hamwe ni intwaro ikomeye yahashya Coronavirus-Perezida Kagame

Perezida Paul Kagame arahamagarira abatuye isi guhuza imbaraga mu rugamba rutoroshye rwo guhashya Coronavirus. Iyo ntwaro ni yo gusa ishobora kuvana isi muri aka kangaratete irimo.

Mu butumwa aherutse kunyuza ku rubuga rwe rwa Twitter,Perezida Paul Kagame aragira ati "nk'uko bisanzwe tuzatsinda muri ibi bihe bikomeye, binyuze mu bufatanye no gukorera hamwe."

Perezida Kagame asanga kwitwarararika abanyarwanda bakomeje kwerekana mu bihe byose bahanganye n'ibibazo kandi bakagera ku musaruro mwiza.

 Abatuye isi baramutse bigannye abanyarwanda, nta cyababuza kugera ku musaruro mwiza wo guhashya Coronavirus.

Perezida Kagame muri ubwo butumwa agenera abantu bose, akomeza asaba abatuye isi kwifatanya n'abo Coronavirus imaze kuvutsa ubuzima, no gushyigikira abakora mu nzego z'ubuzima.

Aragira ati "ubwo isi yugarijwe n'icyorezo cya COVID19, tuzirikane abo imaze kuvutsa ubuzima imiryango yabo n'inshuti zabo. Duteye ingabo mu bitugu abakora mu nzego z'ubuzima, kandi twifurije abayirwaye bose gukira vuba".

Ashimira Dr. Tedros na n'Ishami ry’umuryango w'Abibumbye ryita ku buzima bakumeje kurangaza imbere y'abatuye isi muri ibi bihe.

Gukaraba intoki ni uburyo bwo kwirinda kwandura no gukwirakwiza COVID19

Perezida Paul Kagame arasaba abantu bose kugira umuco wo gukaraba intoki kenshi no kwirinda guhana ibiganza. 

Arabasaba kandi kwirinda kujya ahateraniye abantu benshi, baba bagize impamvu zituma bajya ahantu ahantu nk'aho, bagahagarara ahitaruye.

Umunyamabanga Mukuru w'Umuryango w'ibihugu bivuga igifaransa (Organisation internationale de la Francophonie) Louise Mushikiwabo, nawe asanga guhuza imbaraga ari bwo buryo bwo gutsinda Coronavirus.

Arahamagarira abantu bose kugira uwabo umuhigo watanzwe n'Ishami ry'umuryango w'Abibumye ryita ku buzima, wo gukaraba intoki neza kandi igihe cyose.

Arasanga gukaraba intoki neza kandi igihe cyose, ari uburyo bwo kwirinda kwandura no gukwirakwiza Coronavirus.

Mu butumwa bwe buri mu rurimi rw'igifaransa, Madamu Mushikiwabo avuga gukaraba intoki neza kandi igihe cyose ari ngombwa, hagamijwe kwirinda kwandura no kurinda imiryango n'inshuti kwandura Coronavirus, no guhagarika ikwirakwizwa ryayo.

Madamu Mushikiwabo aragira ati "fata hagati y’amasegonda 40 na 60 ukoresheje amazi meza n'isabune, ugakaraba inyuma y'ikiganza; mu kiganza; hagati y'intoki ariko ntiwibagirwe no mu nzara".

Madamu Mushiki wabo arashishikariza abantu bose kugira uwo muhigo uwabo, no gushyira mu bikorwa uburyo bwo gukoraba intoki neza.