• 2020-05-27
• admin123
• bihinduwe na Kimomo
• 128

Tumenye ibirangirire: Bimwe mu byaranze ubuzima bwa Gaby Espino

Abantu batari bake baba abana cyangwa abakuru, bakunda imyidagaduro. Bamwe bakishimira umuziki, abandi bagakunda imikino nk'umupira w'amaguru, iy'intoki itandukanye, abandi cyane cyane ab'igitsina gore bagakunda kureba filimi zitandukanye. Mu nyandiko y'uyu munsi tugiye kumenya ubuzima bw'umwe mu bakinnyi ba filimi umaze kuba ikirangirire Gaby Espino

Abantu benshi baba barabonye cyangwa barumvise filimi yitwa El Diablo, cyangwa Mas Sabe el Diablo, yatumye abenshi bayibonye basigarana mu mutwe izina rya Manuela, umugore wahindutse isibaniro ry'umwana na se (Angel na Martin) bamurwanira.

Uyu mugore nyine wahawe iryo zina Manuela muri iyi filime tuvuze haruguru, yitwa Gaby Espino, akabyiniriro gakomoka ku mazina ye nyakuri,  Maria Gabriela Espino Rugero. Yavukiye mu Umujyi wa Caracas muri Venezuela kuwa 15 Ugushyingo  1977.

Uyu mugore usigaje amezi atanu ngo yizihize  isabukuru y'imyaka 43 y'ubukuru, ni umukinnyi wa filimi akaba n'umunyamideri w'ikirangirire mu gihugu akomoka mo cya Venezuela ndetse no ku isi muri rusange.

Uyu mugore ufite se w'umuhanga muri Chimie na nyina wakoraga ibijyanye no kwamamaza, yabanje gushaka kwiga ibijyanye n'ubuvuzi (Medecine), agitangira kaminuza, ariko aza guhitamo kwiga ubumenyi bw'ibibaho (ontologie), aza kongera guhindura ibitekerezo ajya mu bijyanye no kwamamaza nka nyina.

Mu mwaka wa 1995, atangira kwiga imbyino (dance), n'imikino (Scene) muri Escuela Luz Columbia i Caracas.

Ubuzima bw'urukundo bwa Gaby Espinoza

Gaby agize imyaka 29, ashyingiranwa n'umukinnyi wa filimi wo muri Venezuela Cristobal Lander, babyarana umukobwa Oriana Lander Ospina ubu ufite imyaka 12. 

Mu mwaka wa 2009 ubwo yakinaga filimi yitwa Mas Sabe el Diablo, Gaby yacuditse n'undi mukinnyi wa filimi Jencarlos Canela, ubwo bucuti budasanzwe buzana agatotsi mu mubano we n'umugabo we, bituma bamara igihe batari kumwe, kuva mu ntango za 2010, kugeza mu Ugushyingo muri uwo mwaka ubwo baje kongera gusubirana, nyuma y'amezi ane ni ukuvuga muri Werurwe 2011, Gaby atandukana burundu n'umugabo we.

Nyuma y'amezi menshi havugwa inkuru itari ifite gihamya, Gaby na Jencarlos Canela baza gutangariza abanyamakuru  ko bakundana, ndetse ko Gaby Espino atwite inda ya Jencarlos, maze kuwa 12 Gashyantare 2012 Gaby yibaruka umuhungu Nickolas Canela Espino.

Kuwa 26 Kanama 2014, aba bakinnyi ba filimi batangaza ko batakiri kumwe ku nkuta zabo za Facebook.

Kuva muri 2016 kugeza 2017, uyu mukinnyi wa filimi yakundanaga n'undi mukinnyi wa filimi Arap Bethke, aho batandukaniye, Gaby ashyira ku mugaragaro kuri instagram ye inshuti ye nshya Jaime Mayol.

ubuzima bwa kinyamwuga

Uyu mugore yatangiye kugaragara kuri televiziyo, mu mwaka wa 1997, akina filimi zizwi nka telenovelas  (filimi zikinirwa muri Amerika y'majyepfo, zikagira uduce twinshi, buri gace katarengeje iminota iri  hagati ya 40 na 50, zikanyura kuri televiziyo buri mugoroba kuva kuwa mbere kugera kuwa gatanu, zikamara amezi arindwi cyangwa umunani zitambuka. Zatangiye gukinwa mu myaka ya za 1950).

Zimwe muri izo filimi zigenewe ingimbi n'abangavu, twavuga nka A todo corazon, aho yakinnye yitwa Natalia, na Asi es la Vida. Nyuma y'umwaka umwe gusa, akina mu mwanya ukomeye yitwa Ivana muri filimi ya Enamorada1 ari kumwe na Cubain Rene Lavan.

Filimi  yakinnye zatumye agaragara cyane ni nka Luna la heredera (Luna Heritiere) yasohotse mu mwaka wa 2004 yakinnye yitwa Luna; Rebeca yakinnye ari Princesa Izaguirre Zabaleta;  yo mu mwaka wa 2003; Mas sabe el Diablo yakinnye yitwa Manuela Davila ari kumwe na Jencarlos Canela witwa (Angel Salvador) na Miguel Varoni yitwa Martin Acero El Hierro yo mu mwaka wa 2009-2010; n'izindi. Muri iyi filimi, Gaby Espino yahawe igihembo cy'umwaka cy'umukinnyi w'umugore wahize abandi kuri Televiziyo ya Telemundo.

Hari kandi santa dibla (saint diable) yakinanye na Aalon Diaz na Carlos Ponte yasohotse mu mwaka wa 2014. Hari n'ibiganiro bitandukanye yagiye ategura kuri Telemundo nka Yo me llamo.