• 2020-11-18
• admin123
• Bimenyimana J.
• 231

Tumenye mu Bitare bya Mashyiga ahatwikiwe ba ka Mazimpaka

Kuba abanyamahanga badasiba gusimburana mu Rwanda, ni uko bafite icyo bahabona, bakagenda bakabwira abo basize ko U Rwanda rukize ku byiza bitandukanye nk'ibirwa biba mu biyaga bitagira uko bisa. Hari kandi imisozi iriho amashyamba, indi ihinze, muri iyo hari mo uwitwa Mu Bitare bya Mashyiga, hafite uburanga bwihariye, n'amateka atangaje.

U Rwanda ni igihugu gito, ariko gikunguhaye ku byiza Nyaburanga. Uretse ibirunga; imisozi; ibiyaga; inzunzi; ibitwa; ibibaya; amashyamba kimeza ndetse n'inyamaswa zitandukanye ziyatuye, hari ibindi byiza nyaburanga bibereye ijisho, u Rwanda rwihariye.

Mu Bitare bya Mashyiga (Reba ku ifoto hejuru yafotowe na Bimenyimana J.) ni mu karere ka Kamonyi, Umurenge wa Karama mu kagri ka Bitare. Aho hari uruhererekane rw'ibitare binini, byitiwe Mashyiga ko bigiye bishyigikirana nk'uko abanyarwanda bo hambere, bajyaga bashyigikira amashyiga bagiye guteka.

Iyo umuntu ageze aho mu Bitare bya Mashyiga asanganirwa n'icyapa cy'Ikigo cy'u Rwanda cy'iterambere RDB (Rwanda Development Board) gifite ubukerarugendo mu nshingano zacyo. Icyo cyapa kigaragaza ko Mashyiga atari umuntu waba yarakoze ibidasanzwe ngo yitirwe aho, ahubwo hitwa Mashyiga kuko hari ibitare bigiye bishyigikiranye n'ibindi nk'uko amashyiga ashyigikira inkono.

Kayijamahe Isidori umusaza wo mu karere ka Rulindo avuga ko afite imyaka 94 y'amavuko. Ubwo twaganiraga mu minsi ishize, yemeza ko aho hantu hiswe Mashyiga, kuko hatwikiwe abagore ba Yuhi III Mazimpaka, bazira ko bamwerekanye. N'ubwo atatubwiye amazina y'aba bagore, RDB yo ibavuga amazina ko ari Kiranga na Cyihunde, nk'uko bigaragara kuri icyo cyapa.

Igisoro cyitiriwe Ruganzu Il Ndoli (hasi ku ifoto yafotowe na Bimenyimana J.), nacyo kiri mu Bitare bya Mashyiga

Icyo amateka avuga kuri aba bagore

Ku ngoma ya Yuhi III umwami w'u Rwanda, Ntare III Kivimira umwami w'u Burundi yateye u Bugesera bwatwarwaga na Nsolo III Nyabarega.

U Bugesera buratsindwa, umwami wabwo ahungira mu Rwanda. Umurwa w'u Rwanda muri icyo gihe wari ku Ijuru rya Kamonyi, kuko nta mwami witwa Yuhi wambukaga Nyabarongo.

Nyabarega ageze mu Rwanda ahabwa icumbi ahitwa Jenda na Kabugondo mu cyahoze ari Komini Mugina (ubu ni mu murenge wa Mugina mu karere ka Kamonyi). Aho kandi hakomokaga abagore babiri ba Yuhi III bari abakobwa ba Kagoro w'Umucyaba umwe akitwa Kiranga undi Cyihunde.

Amaze kugera mu icumbi rye, Nsolo III Nyabarega yashatse kubonana na Yuhi III Mazimpaka, ariko abiru bakomeza kubyanga bavuga ko imana yanze byereza (twibuke ko nta kintu na kimwe cyakorwa mu Rwanda hatabanje kuraguriza).

Nk'uko bivugwa na Musenyeri Alegisi Kagame, ngo impamvu Nyabarega yashakaga guhura na Yuhi III Mazimpaka, yashakaga kumusaba ko yamufasha kurwanya Ntare III umwami w'u Burundi.

Ibi ntibyari gushoboka kuko u Rwanda n'u Burundi bari bafitanye amasezerano yo kudaterana, yashyizweho na Mutara I Semugeshi ku ruhande rw'u Rwanda na Mutaga Semwiza ku ruhande rw'u Burundi.

Abatekereza bavuga ko hari indi mpamvu Nsolo III yashakaga kubonana na Yuhi III. Ngo yashakaga kumwitegereza no gutangarira ubwiza bwe, Mazimapaka kuko yari yarabaye ikirangirire kubera uburanga yari afite.

Abonye kubonana na Yuhi III bidashobotse, Nyabarega ahitamo kwitabaza izindi nzira, asaba aba bamikazi bavaga inda imwe, banatuye ku dusozi duteganye umwe yari atuye ku kitwa Mbazi, undi atuye ku kitwa Bubazi, abasaba kumwereka Yuhi III Mazimpaka.

Aba bakobwa ba Kagoro barabimwemerera bamwereka ahantu azihisha, maze umwami w'u Rwanda aza kuhanyura, umwami w'u Bugesera aramwitegereza.

Iki gikorwa cyaje kumenyekana, banamenya ko byakozwe n'abo bagore ba Yuhi III Mazimpaka, umwami arabatanga, babakaranga kuri rumwe mu bitare byo mu Bitare bya Mashyiga (mbere hitwaga mu Gishubi, hari n'ahandi hafi aho hitwa mu Gishubi cya Muganza) ni hafi y'i Rukoma.

Nyuma y'igihano cy'urupfu cyahawe aba bagore, umwami w'u Bugesera ategekwa kuva mu Rwanda, ahungira mu Ndorwa.

Yuhi III Mazimpaka aca iteka ko ntawe umukomokaho, uzashaka umugore w'umucyabakazi.

Agace kamwe ko mu Bitare bya Mashyiga (photo internet)

Uretse uruhererekane rw'ibitare n'imisozi myinshi ihakikije, mu Bitare bya Mashyiga  hari igisoro cyitiriwe Ruganzu II Ndoli wayoboye u Rwanda ahagana mu mwaka wa 1510-1543

Abantu baturutse imihanda yose, bahurira iminsi nibura ibiri mu cyumweru baje gusenga, ngo kuko hari amavuta cyane! 

Umwe mu bo twaganiriye, atubwira ko uretse icyorezo cya Covid-19 cyatumye abantu bataza ari benshi, kuko amateraniro atemewe, ubundi ngo hateranira abantu benshi cyane.

Aragira ati "uzagaruke nyuma y'ibi bihe urebe! Abantu baba ari uruvunganzoka baje gusengera aha hantu, kuko hari amavuta cyane! Uhazanye ikibazo wese ataha asubijwe".