• 2021-09-05
• admin123
• Kimomo
• 139

Ishyingurwa rya Jay Polly: Gufata umurambo byari mo umubabaro utavugwa

Imihango yo gusezera bwa nyuma kuri Jay Polly yabaye kuri uyu wa 05 Nzeri 2021. Gufata umurambo we ku bitaro bya Kacyiru, byahuruje abantu benshi, ku buryo bitari byoroshye kubona aho umuntu ahagarara.

Urupfu rutunguranye rwa Tuyishime Josue uzwi ku izina rya Jay Polly, rwababaje cyane abakunzi b'umuziki mu Rwanda muri rusange, ariko rushengura bikomeye abakunzi be bari bamaze kuba benshi cyane mu Rwanda, no hirya no hino ku isi, rudasize n'abo mu muryango we.

Kuwa 02 Nzeri nibwo inkuru y'urupfu rwa Jay Polly yamenyekanye, maze Urwego rushinzwe imfungwa n'abagororwa (RCS) rutangaza ko yanyoye Alchool yifashishwa mu kogosha.

Nk'uko abaganiriye n'ikinyamakuru Isanzure Magazine babivuga, u Rwanda rubuze umuntu wa mbere mu muziki, cyane cyane injyana ya Hip Hop.

Bisengimana Aime arasanga urupfu rwa Jay Polly rudakwiye kuba umwanaya w'amarira n'amaganya kuko nta muhanzi upfa, ibihangano bye bisigara bivuga.

Aragira ati "Jay Polly agiye akiri muto. Ariko twe abakunzi be ndetse n'abanyarwanda muri rusange, adusigiye umurage ukomeye, wo koroherana mu buzima no kubana amahoro".

Akomeza asaba abakunzi ba Jay Polly gukurikira uwo murage bakimika urukundo.

Kayisire Kayitesi we yemeza ko Jay Polly yamubereye icyitegererezo, kuko yatumye uyu munyarwandakazi akunda umuziki w'u Rwanda, we yabonaga nk'udahari.

Avuga ko indirimbo za Jay Polly zazamuye imyumvire y'abanyarwanda benshi ku bijyanye n'uruganda rwa muzika mu Rwanda.

Christopher yaheze mu gihirahiro

Nyuma y'itangazo ry'Urwego rw'igihugu rushinzwe imfungwa n'abagororwa, rivuga ko Jay Polly yanyoye Alchool yifashishwa mu kugosha, umuhanzi Muneza Chistopher yibajije icyo uru rwego rukora ngo ngo rwite ku bagororwa bafite ibibazo byo mu twe.

Inkuru dukesha Isimbi, iravuga ko abinyujije ku rubuga rwe rwa twitter, Muneza Christopher yandiitse ati: "ariko ubundi ni ubuhe buryo RCS ikoresha mu kwita ku buzima bwo mu mutwe bw'abagororwa"?

Jay Polly witabye Imana, yari afungiye muri gereza ya Mageragere, akurikiranweho icyaha cyo gukoresha ibiyobyabwenge. Umunsi yapfiriye ho ni nawo munsi yagombaga kwitaba urukiko.